بئلبي انت

بئيان شي عشر ايام وامشي ..لو بتعرف اديشها متعبة العيشة هونيك ..بشتهي احيكليك بس بحسك ما بتسمعني... عم ئول انشالله هالتعب كلو بجبلي بالاخير هدوء نفسي لحالي
بخاف منك ايام... مو بايدي وئت بئرا شو بكتب بحس اني مو ئدك ... مو ئد ازا جرحتني مو ئد وجعك ..وبرجع وبئول كلو وهم .. وهم كبرتو بمخي ما عم ئدر رد صغرو.. ما رح يطلع من هالشي كلو شي ولازم سكر عليك..لازم الغي كل لينكاتك وسكر عليك...أمتى رح ائدر سكر عليك....؟ ئلي امتى؟ خايفة " تمل" مني وما تعود ترد علي.... ما فاجئتني هالكلمة ......لانو ئدي صاير بيمل مافي... حتى ايام بمل من ئديش بفكر فيك وئديش بئرالك وئدش بشتئلك..بمل من ضعفي ئدامك..حاسة انو ازا طلبت شو ما طلبت ما رح ائدر ئلك لأ.. اصلن ما بفكر بخيار ال"لأ" ..أًبي شو هالعجز يلي صاير فيه؟
حكيك ..لو بتمسع حكيك يمكن كنت عشئت حالك..لو بتسمع الطرئية يلي بدلل فيها " بنتك" يمكن كنت عشئت حالك.. طريئة الدلال تبعك مو طبيعية .. يعني يلي بدو يدلل حبيبتو يجي يسألك شو يعمل..يمكن

لاز م تكتب نظرية عن كيفية تدليل المرأة

.
بس انو وئت بتسب عليي ..بضحك من ئلبي ..بحسك عم تلعب معي
وبخاف منك.. لا تسألني من شو خايفة بس خايفة.

عم اختنئ كل مابشوفك رادد عبنت ..عم اختنئ ما عم ائدر شوفك عم تحكي مع حدا. ماعم ائدر اتخيلك نايم مع حدا.. بس عم اجبر حالي شوف وفكر بهالطريئة لأنك مو الي ....ببساطة مو الي.... ولازم افهم هالشي.. افهم انك مو الي . ما بتخيل انو بنت بحياتك مرت ما تكون عشئتك ...... بعرف انو البنات بيتحركشو فيك ..أكيد بيتحركشو فيك.... ومتأكدة انو انت اعمى ئلب ما عم تشوف..
مشتهية استقر مع حدا..مشتهية شتي معو ..وصيف معو ...أبكي معو ..واضحك معو ..مشتهية احكيلو كل شي ويحكيلي كل شي ..مشتهية فيئ الصبح لائي وقبل ما نام ضلني اتطلع فيه... مافيني اكتب وئول يا ريتك انت هالحدا .. مو من حقي ..
بعرف انك بدور عالبنت تبعك يلي بترسمها ..أكيد حتلائيها ..دور عليها بتلائيها..لا تفكر انك حتمّل منها ازا لئيتها..لا ..رح تمّل ازا ما لئيتا
انا بعرف انك مو عايش ناسك بس انت مو تارك ئلبك يتحرك , يلي تاركو يتحرك شي تاني ..بس كل ما تحرك ئلبك بتوقفو..أبي المرة الجاية بيتحرك لا توقفو ..... خليه يتحرك ..مو من حقك توقفو..

كل مرة بحكي معك فيها بئول بدي اسالك واسالك واسالك ...أسالك كل شي عملتو بهالدنيا ...بس بحسك مو معي .. وبستحي ..وبخاف تتدايئ..لأنو اكيد شو دخلني
بعرف انك بضل بتئلي بتحبني , وحكي الدلال تبعك أُبي لو بعيش ئد الدنيا كلها ما رح شوف هالدلال.. بس بعرف اتك عم تحب حدا فيني ..مابعرف مين هالحدا...عم تحب وهم انت راسمو ..بس ما حبيتني الي.. ما حبيت رهف...وهادا الشي عم يئتلني من جوا .... كيف فيني خليك تحبني الي , انا رهف..... بس كمان شو الفايدة ...ما كمان انا عشئانة وهم .
لوفيني اجي شوفك..يا ترى بتخليني اجي شوفك؟ دايما بسأل حالي لو في مجال كنت خليتني .. ولا كنت منعتني لتخليني وهم ..رسمة بمخك يمكن ماتكون متل الواقع.... بكره الواقع ....بكرة هالجنان يلي انا في ...جنان ما بسميه غير جنان.

بحبك أًبي ..بحبك ألي تكون..وما رح تكون.. بحبك معي تكون..وما رح تكون.. بحب دلالك الي يكون وما رح يكون

تعبانة أُبي .. وتعبانة من هالتعب.... انو والله انا لسا صغير على كل هالتعب ..يعني بفكر ايام انو المفروض كون عم اضحك والعب ..ونط وجن ....بس بضل ببكي ..بشتهي ايام روح افتح ئبر وحط حالي فيه... بس حتى الئبر بيخوف .....
شو بدك بهالحكي كلو

بحبك ومشتئتلك حتى وئت بتكون معي بشتئلك
عينك عحالك